MANILA, Philippines – Inaresto ng National Bureau of Investigation (NBI) ang negosyanteng si Francis Leo Marcos dahil sa umano’y paglabag sa optometry law.
Ayon sa NBI, hinuli si Marcos ngayong Martes kaugnay ng kinakaharap nitong kasong paglabag sa Republic Act 8050 o ang Revised Optometry Law sa Baguio City.
Dinakip ng NBI Cybercrime Division si Marcos sa bahay nito sa Quezon City sa bisa ng warrant of arrest na inilabas ng korte sa Baguio.
Taong 2010 pa umano naisampa ang reklamo at noong February 2018 lumabas ang warrant.
Wala pang inilalabas na detalye ang NBI ukol sa kaso ngunit ayon kay Marcos, nag-ugat umano ang reklamo sa pamamahagi niya ng libreng eyeglasses at pagsasagawa ng libreng checkup sa mata nang walang permiso mula sa Philippine Optometrist Association.
Bukod sa nasabing reklamo, sinabi ni NBI deputy director Atty. Ferdinand Lavin na nahaharap din si Marcos sa kasong paglabag sa Anti-Human Trafficking in Persons Act na isinampa noon pang 2006.
Nahaharap din ito sa kasong exploitation at paglabag sa Republic Act 9262 o ang Violation against Women and Children Law na isinampa naman sa Gapan, Nueva Ecija.
Dagdag pa ni Lavin na iniimbestigahan na rin nila ang totoong pangalan ni Marcos.
“Also we are in the process of investigating his true identity because we have been receiving reports that he had been named before as Norman Mangusin,” ani Lavin.
Pinabulaanan naman ni Marcos ang mga alegasyon laban sa kanya,.
“Talaga pong tayo’y napag-iinitan lang pero wala naman pong problema patutunayan natin sa korte yan lahat ng alegasyon na yan,” ani Marcos.
Bukod sa pagiging negosyante, isa ring internet personality si Marcos dahil sa kanyang videos sa YouTube channel na may mahigit isang milyong subscriber. – RRD (mula sa ulat ni Correspendent Dante Amento)
The post Negosyante at internet personality Francis Leo Marcos, hinuli ng NBI appeared first on UNTV News.