MANILA, Philippines — Magpapadala ang Meralco ng hiwalay na notice para sa monthly installment sa mga costumer nito upang makagaan sa mga bayarin sa gitna ng krisis ng coronavirus disease (COVID-19).
Ito ay alinsunod sa direktiba ng Energy Regulatory Commission (ERC) kung saan ang mga customer na may konsumong 200 kWh pababa simula Pebrero ay maaring hatiin ang bayad sa naipong konsumo mula March 1 hanggang May 31 sa loob ng anim na buwan.
Habang ang may konsumong 201 kWh pataas noong Pebrero ay hanggang apat na buwan lamang ang installment plan.
Halimbawa, kung P5,400 ang naipong halaga para sa Marso hanggang Mayo, hahatiin ito sa anim na buwan.
Ibig sabihin, mula Hunyo hanggang Nobyembre ay may dagdag na bayad tuwing a-kinse ng buwan na halagang P900.
Paglilinaw ng Meralco, hindi kasama sa kuwenta ng installment plan ang regular na konsumo sa bawat buwan.
Dahil sa pagkagulat na naidulot ng biglang pagtaas ng billing, nagpasya ang Meralco na magpadala ng sulat sa mga costumer upang maipaliwanag ang naging kompyutasyon ng kanilang konsumo mula Marso hanggang Mayo at kung bakit mayroong napadalhan ng overestimated o di kaya’y underestimated na billing para sa mga naturang buwan.
Ayon sa kumpanya, ibinase ang billing sa average consumption sa nakalipas na tatlong buwan mula nang suspendihin ang pagbabasa ng metro ng kuryente dahil sa pagpapatupad ng enhanced communtiy quarantine (ECQ).
Base sa naging Joint Committee Hearing ng Energy Commission noong nakaraang linggo, sinabi ng Meralco na itinuloy lamang nila ang pagbabasa ng metro noong April 11 para sa commercial at industrial companies habang April 27 naman sa residential customers.
Subalit halos wala pang isang porsyento sa mga residential clients ang nabasahan noong Abril, ayon sa Meralco.
“May mga area ho na hindi pa namin napapasukan para mag meter read because strikto ang area or still under lockdown,” paliwanag ni Victor Genuino, ang vice president at head ng Customer Retail Services and Corporate Communications ng Meralco.
“We will strive for para basahan itong mga metro in June, and adjustments in the May bill will be reflected in the June bill,” dagdag nito.
Naglabas ng direktiba ang ERC na magpadala na lamang ng bukod na billing base sa aktuwal na konsumo.
Nangako rin ang Meralco na ibabalik ang sobrang bayad o di kaya ay ike-credit na lamang sa mga susunod na bills ang naibayad nang halaga mula Marso hanggang Abril.
“MERALCO would just like to say that we will fully comply with all the directives of the DOE and ERC regarding ECQ and MECQ on billings, payment extension and installment payments,” ani Genuino.
Upang maiwasan ang ganitong problema, tinitingnan na ng Meralco ang paggamit ng ‘smart meter reading’ na teknolohiya kung saan maaring malaman ang kunsome ng customer sa pamamagitan ng ‘remote reading.’ MNP (sa ulat ni Harlene Delgado)
The post Monthly installment notice, ipadadala ng bukod sa aktuwal na buwanang bill — Meralco appeared first on UNTV News.