MANILA, Philippines – Muling nagpa-alala ang Philippine National Police Highway Patrol Group (PNP-HPG) sa mga motorista na bawal harangan ang bicycle lane sa kahabaan ng EDSA kasabay ng isinagawa nitong operasyon ngayong Huwebes, Hunyo 25.
Ayon kay PNP-HPG National Capital Region Police Colonel Wilson Doromal, sa loob lamang ng kalahating araw nilang operasyon sa Quezon Avenue at sa EDSA, 18 motorista na agad ang kanilang nahuli at binigyan ng ticket.
Kabilang sa mga nahuli ang mga pribadong sasakyan, mga motorsiklo at taxi dahil sa pagharang o pagparada sa bike lane.
“Obstruction ang kalimitang violations nila saka po yung disregarding traffic sign,” ani Doromal.
“Huwag na po nating paradahan itong bike lane. Ibigay po natin ang bike lane sa mga cyclist o nagbi-bisikleta para po iwas-disgrasya sila. Panatilihin po natin ang ating self-discipline, respetuhin po natin yung bicycle lane,” dagdag pa niya.
Ang bike lane ay inilagay sa EDSA para sa mga gumagamit ng bisikleta papasok sa trabaho sa gitna ng limitadong operasyon ng pampublikong transportasyon sa Metro Manila.
Samantala, pinaalalahanan rin ng HPG ang mga motorista na huwag dumaan sa bus way dahil ekslusibong linya ito para sa city buses at maaari silang maharap sa multa kapag lumabag sa polisiya. – RRD (mula sa ulat ni Correspondent Lea Ylagan)
The post 18 motorista na humarang sa bicycle lane sa EDSA, hinuli ng HPG appeared first on UNTV News.