MANILA, Philippines — Inaasahang ilalabas na ngayong linggo ng Department of Education (DepEd) ang listahan ng 120 paaralan na makakasama sa pilot test ng face-to-face classes.
Ayon kay DepEd Undersecretary Nepomuceno Malaluan, nakatakdang magpulong ngayong Lunes ang kanilang regional directors para sa pinal na listahan ng mga lalahok sa limitadong in-person learning program.
Layunin ng pagpupulong na matalakay ang iba pang mga katanungan o isyu sa pilot run ng physical classes. Pag-uusapan rin sa pulong ang isinagawang risk assessment bago ang pagsasapinal at pagsasapubliko ng listahan.
Giit rin na Malalan na limitado lamang ang mga mapipiling eskwelahan at bilang ng mga mag-aaral na sasabak sa physical learning program na target isagawa sa loob ng dalawang buwan.
“Gusto talaga natin na masiguro na maayos itong magiging pilot natin dahil nakasalalay dito yung expansion,” ani Malaluan.
“We really appeal to everyone, this is not a localized effort but a national effort… We hope that we will regard this as a national effort even if this are happening in certain select areas,” dagdag pa niya.
Una nang sinabi ng DepEd na 100 pampublikong paaralan at 20 pribadong paaralan lamang sa mga lugar na mababa ang banta ng COVID-19 ang kasali sa pilot run.
Labindalawang estudyante sa Kindergarten, at 16 mag-aaral naman ang kasali sa Grades 1 hanggang 3. Nasa 20 learners naman ang kasali para sa Technical-vocation classes sa limang senior high schools.
Tatlong oras lamang ang ilalagi sa paaralan ng kindergarten hanggang Grade 3 students habang ang senior high school students naman ay hanggang apat na oras.
Pinagsamang face-to-face classes at distance learning din ang gagamiting programa na ang ibig sabihin ay may mga araw na naka-online classes pa rin ang mga mag-aaral.
Kailangan ding bakunado na kontra COVID-19 ang mga guro at school personnel na sasali sa pilot test. Dapat rin ay nasa 65-anyos pababa ang kanilang edad at walang co-morbidity.
Una nang tiniyak ng DepEd na naghanda na ito ng contingency plan para sa iba’t ibang senaryo sakaling magkaroon ng kaso ng hawaan ng COVID-19 habang isinasagawa ang pilot run.
The post Listahan ng 120 paaralan na kasama sa pilot face-to-face classes, ilalabas ngayong linggo – DepEd appeared first on UNTV News.