Image may be NSFW.
Clik here to view.
MANILA, Philippines – Bumaba ang approval ratings ng Duterte administration batay sa pinakahuling survey ng Pulse Asia.
Sa survey na isinagawa noong September 6-11, 2021 sa 2,400 adult respondents, bumaba ang approval rating ng pamahalaan sa pagtugon sa 14 national issues.
Sa isyu ng paglaban sa korapsyon, 52% ang nakuhang marka ng administrasyon na 12% na mas mababa kumpara sa 64% na naitala noong Hunyo 2021.
Sa usapin naman ng paglaban sa kriminalidad, 74% ang nakuhang grado ng pamahalaan na 5% na mas mababa kumpara sa 79% noong Hunyo.
Nasa 37% naman ang approval rating sa pagkontrol sa inflation o paggalaw ng presyo ng mga bilihin, 59% sa pagpigil sa pagkalat ng COVID-19, 48% sa pagtaas sa sahod ng mga manggagawa, 64% sa pagbibigay ng ayuda sa mga nawalan ng trabaho dahil sa pandemya, at 41% sa pagtugon sa kahirapan.
Tumaas rin ng 10% ang disapproval ratings ng administrasyong Duterte sa pinakahuling survey pagdating sa isyu ng paglaban sa katiwalian (22%) at kahirapan (32%) kumpara sa naitala noong Hunyo.
Sa kanyang public address noong Martes ng gabi, sinabi ni Pangulong Rodrigo Duterte na batid niya ang pagbaba ng public ratings ng kanyang administrasyon habang papalapit ang pagtatapos ng kanyang termino.
Kaya naniniwala siyang tama ang kanyang pasya na magretiro na sa pulitika pagkatapos ng kanyang termino sa Hunyo 30, 2022.
“It’s still good but I think it’s time. There’s always a time for everything. Even if you get a 64 rating, may panahon-panahon ang buhay. So sa palagay ko, tama ‘yung ginawa ko,” ang pahayag ng pangulo.
Umaasa naman ang pangulo na itutuloy ng susunod na administrasyon ang mga repormang kaniyang sinimulan kabilang na ang mga proyekto sa imprastraktura at paglaban sa katiwalian at iligal na droga.
“It is time to give way to a new set of leaders who hopefully continue the reforms of projects and programs that this administration has pursued for the past few years. It is my hope that the new set of leaders will pursue a platform of gov’t that will build on our gains in the areas of fighting illegal drugs, criminality, corruption, terrorism and insurgency,” ang wika ng pangulo.
The post Approval ratings ng Duterte admin sa COVID-19 response, anti-corruption drive bumaba – Pulse Asia appeared first on UNTV News.
