MANILA, Philippines – Muling umapela si Pangulong Rodrigo Duterte sa publiko na magpabakuna na kontra COVID-19 upang agad nang maabot ng bansa ang minimithing herd protection laban sa nakakahawang sakit.
Ginawa ng pangulo ang apela sa gitna ng marami pa ring bilang ng mga Pilipinong ayaw magpabakuna sa kabila ng pagdating ng mga suplay sa bansa.
Kung ayaw magpabakuna, sinabi ng pangulo na dapat hanapin ang mga ito sa bawat barangay at “turukan habang tulog.”
“Alam ko marami pang ayaw eh. Iyan ang problema ‘yung ayaw, ayaw magpabakuna. Kaya hanapin ninyo ‘yan sa barangay ninyo. Akyatin natin ‘pag tulog at turukin natin habang natutulog para makumpleto ‘yung istorya. Eh kung ayaw, eh ‘di akyatin sa bahay eh, tusukin natin sa gabi. Ako ang mag-ano — I will lead the journey,” ang wika ng pangulo sa kanyang recorded na Talk to the People noong Lunes ng gabi.
Sa ngayon ay pinalalawak na ng pamahalaan ang coverage ng mass vaccination sa bansa.
Sa Biyernes, Oktubre 15, ilulunsad na ang pagbabakuna sa mga batang may edad 12 hanggang 17 na may co-morbidities saw along ospital sa Metro Manila.
Sinisimulan na rin ang pagbabakuna sa general adult population sa ilang lugar.
Nasa 23 milyong Pilipino ang fully vaccinated laban sa COVID-19 habang 26 milyon naman ang nakatanggap ng unang dose mula nang simulan ang vaccination program noong buwan ng Marso.
The post Pangulong Duterte sa mga ayaw magpabakuna vs COVID-19: ‘Turukan habang tulog’ appeared first on UNTV News.