Bagaman isinusulong ng Malacañang sa kahalagahan ng pagbabakuna ng ating mga kababayan kontra COVID-19, iginiit nito na kinakailangan pa rin ang isang batas bago ipagbawal ang hiring sa trabaho ng mga hindi pa nababakunahan.
Ayon kay Presidential Spokesperson Secretary Harry Roque Jr. hindi maaaring basta na lamang ipagbawal ang hiring sa trabaho ng mga aplikante na hindi pa bakunado kontra COVID-19.
“Kinakailangan po siguro ng batas kung ipagbabawal ang pagha-hire ng mga non-vaccinated individuals,” aniya.
Isa sa mga suhestyon ng pribadong sektor para mapalawak pa ng pamahalaan ang COVID-19 vaccination rollout ay ang gawing requirement ang bakuna sa hiring sa trabaho.
Pero para sa labor group na Associated Labor Unions-Trade Union Congress of the Philippines (ALU-TUCP), discriminatory ang nasabing panukala at hindi makakabuti sa ekonomiya ng Pilipinas.
Giit ng ALU-TUCP spokesperson Alan Tanjusay, marami sa mga Pilipino ang hindi pa rin nababakunahan kaya’t hindi maari na bakunado lamang ang papayagan ng pamahalaan na makapag-apply sa trabaho.
“Babagsak ang ating ekonomiya, maraming mga manggagawa at kanilang pamilya maghihirap dahil kulang po ang supply ng bakuna at hindi pa sila nababakunahan,” aniya.
Sa halip na higpitan ang mga mangagawa na hindi pa bakunado, iginiit ng labor group na dapat solusyunan ng pamahalaan ang mas mabilis na access sa bakuna ng ating mga kababayan lalo na ang mga nasa malalayong lugar.
“Dapat ang pagtuunan natin ng pansin ay paano ba mababakunahan at papaano ba mapaparating ang mga bakuna doon sa mga probinsya at liblib na lugar kung saan maraming mangagawa ang naghihintay at nangangailangan ng bakuna,” ayon kay Tanjusay.
Samantala, sa panayam kanina kay Department of Labor and Employment (DOLE) Secretary Silvestre bello III sa isang news program, sinabi nito na may legal na basehan na umano, upang obligahin ng mga employer ang kanilang mga empleyado na magpabakuna sa ilalim ng Alert Level 3.
Gayunman hindi naidetalye ng kalihim kung ano ang binabanggit nitong legal basis sa pagpapabakuna.
Pero nang tanungin sa isang interview si DOLE Usec. Ana Dione, nilinaw nito na wala pang batas na nag-oobliga sa mga mangagawa na magpabakuna laban sa COVID-19.
“Ang requirement na bakunado ang isang empleyado medyo wala po tayong basehan diyan, wala pong basis in law, so ibig sabihin hindi po pupwedeng gawin ng mga kumpanya yan.
“As a basis, yung unvaccinated as basis of termination palagi po nating inuulit, sinabi at uulitin na yan po ay discrimination. If ang termination niya ang sole basis noon ay unvaccinated hindi po, bawal po iyan,” dagdag nito. (Ulat ni JP Nuñez)
The post Batas, kailangan bago ipagbawal ang hiring sa hindi bakunado —Malacañang appeared first on UNTV News.