MANILA, Philippines – Maglulunsad ng programang pautang ang Department of Tourism (DOT) para sa mga maliliit na negosyo sa sektor ng turismo na naapektuhan ng novel coronavirus disease (COVID-19) pandemic.
Sa panayam sa UNTV Program na Get It Straight with Daniel Razon ngayong Martes, sinabi ni Tourism Undersecretary Benito Bengzon na layunin ng programa na tulungan ang maliliit na negosyante na muling makabangon kasabay ng unti-unting pagbubukas ng turismo sa bansa.
Ayon kay Bengzon, aabot sa P10 bilyon ang inilaang pondo ng DOT para mapautang ang maliliit na negosyante at P6 bilyon rito ang itatalaga sa loan program.
Katuwang nila sa programang ito ang Small Business Corporation (SB Corp.) ng Department of Trade and Industry (DTI).
“Ang pinaka-objective niyan gaya ng binaggit mo, matulungan itong mga tourism enterprises na talagang naghihingalo na. Siyempre, walang turista, walang revenue. Pero napakaganda po ng terms na binigay sa amin ng Small Business Corporation ng Department of Trade and Industry at nakipagpulong na rin kami sa mga private sector at sa pananaw nila maganda rates na ibinigay,” ang wika ni Bengzon.
Aniya, isinasapinal na nila ang mga panuntunan para sa ipatutupad na loan program.
Maliban dito, naglaan na rin ang ang DOT ng P3 bilyong pondong pang-ayuda para naman sa mga manggagawang nawalan ng trabaho.
Ito ay sa pamamagitan ng cash-for-work program na ipatutupad naman sa tulong ng Department of Labor and Employment.
Mayroon ding ilalaang P100 milyon para sa local tour guides na naapektuhan rin ang trabaho.
Samantala, binigyang-diin ng DOT ang pagpapalakas sa sektor ng turismo upang makabawi ang ekonomiya ng bansa.
At upang mahikayat ang maraming turista na bumiyahe sa bansa sa gitna ng pandemiya, sinabi ng kagawaran na nakikipag-ugnayan na sila sa Department of Health para mapababa ang halaga ng swab testing lalo’t kabilang ito sa mga pangunahing requirement na inilatag sa pagbubukas ng ilang tourist destination.
“Ang pinaka-priority natin is tulungang makabangon mga tourism enterprises at tulungan natin mga kababayan natin na nawalan ng trabaho so ito yung magiging priority natin in the next several months or couple of years… Suportahan natin ang domestic tourism dahil ito talaga ang aahon ng ating tourism industry,” ang pahayag ni Bengzon.
Noong nakaraang linggo ay binuksan na sa mga lokal na turista ang Boracay Island at Baguio City. Sa Oktubre 15 naman ay bubuksan na rin ang turismo sa
Ilocos Norte para sa mga magmumula sa Luzon. – RRD (mula sa ulat ni Correspondent Joan Nano)
The post Pamahalaan, may alok na pautang sa maliliit na tourism businesses na apektado ng pandemya appeared first on UNTV News.