Tinaasan ng Baguio City local government ang bilang ng mga residenteng kailangang mabakunahan laban sa COVID-19 kada linggo.
Nais ni Mayor Benjamin Magalong na maabot na ang halos kabuuang bilang ng eligible population sa lungsod bago matapos ang taon.
Nasa 281,000 na residente ang kasama sa mga dapat mabakunahan upang maabot ang herd immunity sa siyudad, at 50% sa mga ito, ay target na mabakunahan ngayong weekend.
“Maganda naman ang rate natin. Actually we broke a record last week when we hit more than 30,000 doses in one week. This week, we’re hoping na ang ating vaccination, we will be able to hit 50% plus sa fully vaccinated this week. ‘Yun ang target namin this week,” ani Mayor Magalong.
Sa pinakabagong datos ng Baguio City Health Services Office, umaabot na sa 49.04% sa target population o 137,797 na residente na ang fully vaccinated.
Habang nasa 182,446 naman ang nakatanggap ng first dose ng bakuna kontra COVID-19.
Kaugnay nito, itinaas pa sa 21,000 ang target nilang mabakunahan kada linggo.
“We need to go beyond the 21,000 na threshold per week. Dapat lumampas tayo dun sa 21,000, so that by first week of December, looking at our forecast and our graph and our time and motion study, kailangan by first week of December ma-hit na natin ung 90-95%,” pahayag ni Magalong.
Ayon pa sa alkalde, hindi problema ang suplay ng bakuna sa siyudad, kaya’t patuloy na hinihikayat nito ang mga taga Baguio City na magpabakuna lalo na’t patuloy na tumataas ang naitatalang nahahawa ng COVID-19.
Maaring magparehistro online sa bakuna.baguio.gov.ph
Sa mga may kamag-anak naman na bedridden na at gustong magpabakuna, makipagunayan lamang sa inyong barangay health workers upang makakuha ng vaccination schedule o tumawag sa mga numerong 0927 358 7272 at 0930 970 0222.
Kasama ang Baguio City sa tatlong syudad sa bansa na isinailalim sa sa mas mahigpit na general community quarantine simula September 24 hanggang September 30, 2021. (Ulat mula kay Bradley Robuza)
The post Mahigit 21K na residente sa Baguio City, target na mabakunahan kada linggo appeared first on UNTV News.