MANILA, Philippines – Mataas umano ang tiyansa na maibaba na ang COVID-19 alert level sa Metro Manila sa mga susunod na linggo.
Ayon kay Presidential Spokesperson Harry Roque, nasa moderate risk level na ang utilization rate ng Intensive Care Units (ICU) beds sa Metro Manila batay sa nakalap na datos.
Mas mainam na rin aniya ang utilization rate sa overall health care capacity, bumababa na rin ang attack rate ng virus at nasa 77.53% na ang full vaccination rate sa capital region.
Kung ang datos ang pag-uusapan, sinabi ni Roque na malaki ang posibilidad na maibaba na ang alerto sa Metro Manila.
Gayunman, kailangan pa aniyang hintayin ang magiging rekomendasyon ng Inter-Agency Task Force for the Management of Emerging Infectious Disease (IATF) ukol rito.
“The data supports a reduction of the alert level, but that’s ultimately the decision of the IATF. So, abangan na lang po natin, magpupulong naman po yan on Thursday,” ani Roque.
Sinabi rin ng opisyal na pag-aaralan pa ng pamahalaan ang resulta ng pilot alert level system na ipinaiiral sa kalakhang Maynila.
Nasa Alert Level 4 ang Metro Manila hanggang sa Oktubre 15. – RRD (mula sa ulat ni Correspondent Rosalie Coz)
The post COVID-19 alert level sa Metro Manila, malaki ang posibilidad na maibaba na – Malakanyang appeared first on UNTV News.