Ang pag-responde ng UNTV News and Rescue team sa motorcycle rider na naaksidente nitong Lunes ng gabi. (UNTV News)
QUEZON CITY, Philippines – Nirespondehan ng UNTV News and Rescue Team ang aksidente na kinasangkutan ng motorsiklo at FX sa Roosevelt Avenue, corner M.H. Del Pilar, Quezon City, pasado alas-10 nitong Lunes ng gabi.
Nadatnan ng grupo ang rider na kinilalang si Ed Madriaga, 25 anyos, na nasa gilid ng gutter at iniinda ang pananakit ng mga binti at balakang matapos tumilapon mula sa minamanehong motorsiklo.
Agad na nagsagawa ng assessment ang emergency medical responders sa biktima, at isinakay sa rescue mobile.
Matapos lapatan ng paunang lunas ay dinala na ng grupo si Madriaga sa Quezon City General Hospital para sa kaukulang medical treatment.
Samantala, hawak na ng Quezon City Traffic Sector 1 ang kaso, at naka-impound na rin ang dalawang sasakyang sangkot sa aksidente para sa kaukulang imbestigasyon. (Benedict Galazan / Ruth Navales, UNTV News)