FILE PHOTO: PNP-PIO Chief P/CSupt. Generoso Cerbo (UNTV News)
MANILA, Philippines — Tukoy na ng PNP ang pagkakakilanlan ng mga abductor ni Naga Zamboanga Sibugay Mayor Gemma Adana.
Ayon kay PNP-PIO Chief P/CSupt. Generoso Cerbo, alam na rin ng Police Regional Office 12 kung anong grupo kabilang ang mga ito.
Bagama’t may mga lumulutang na balitang ang grupo ni MILF lost command Abral Abdulsalam ang responsable sa pagdukot kay Adana ay tumanggi naman ang PNP na kumpirmahin ito.
“Wala pa naman tayong kumpirmadong report mula sa mga operatives sa bagay na yan. Ang masasabi lang natin ay on-going ang operations natin laban sa kanila saan mang panig ng Mindanao nasaan sila,” anang PNP-PIO chief.
sinabi pa ni Cerbo na lahat ng anggulo ay kanilang tinututukan tulad ng pulitika o may kinalaman sa pera.
Idinagdag pa ng heneral na hindi nagpapabaya ang PNP sa kaso at sa katunayan ay katulong na ng mga tauhan ng PRO-12 ang mga sundalo sa paghabol sa mga suspect.
Dagdag pa ni Cerbo, “Lahat naman po ng info na masasabi nating relevant o possible ay lahat naman po iyan ay tinututukan, tinututukan at bina-validate at kung totoo ay appropriate actions will be undertaken.”
Si Adana ay dinukot ng anim na armadong kalalakihan sa kanyang bahay noong Lunes, April 6 habang kumakain. (LEA YLAGAN / UNTV News)