MANILA, Philippines — Lubos na nagustuhan ni Karaoke World Championship Philippines Grand Champion Apple Delleva ang awiting naibigay sa kanya upang i-interpret sa A Song of Praise o ASOP Music Festival nitong Linggo ng gabi.
Napahanga ni Apple sa kanyang interpretasyon ang mga huradong sina multi-awarded composer Jungee Marcelo, OPM Diva Rachel Alejandro at Doktor Musiko Mon del Rosario kaya’t napili itong “song of the week.”
Ani Delleva, “Nung narinig ko po ‘yung song, sabi ko, wow! Talagang maganda po ‘yung lyrics. Lyrics po talaga ‘yung tinitingnan ko every song po na ibinibigay sa’kin. Sabi ko, wow! Maganda ‘yung meaning.”
Maging ang composer nitong si Genio Dy ay humanga sa naturang rendisyon.
“Salamat po dahil napakaganda po ng pagkaka-interpret niya. Parang siya po ‘yung tumama sa hinahanap ko po na… sa kanta po… tamang-tama po.”
Dinaig nito ang mga awiting “Di Magsasawang Purihin Ka” ni Leslie Navarro na inawit ng Bulacan kundiman Champion na si Albert Aguilar at “Ama, Mahal Mo ang Lahat Ko” ni Jerico Moreno na inawit naman ng isa sa singing bees na si Stan Perfecto. (ADJES CARREON / UNTV News)