Ang pagtulong ng UNTV News and Rescue Team sa biktima ng banggaan ng motorsiklo at Vios nitong Huwebes ng madaling araw sa kahabaan ng West Avenue, Quezon City. (UNTV News)
QUEZON CITY, Philippines — Nirespondehan ng UNTV News and Rescue team ang banggaan sa pagitan ng isang motorsiklo at kotse sa bahagi ng Quezon Avenue sa panulukan ng West Avenue sa Quezon City pasado alas tres ng madaling araw nitong Huwebes.
Sa inisyal na imbestigasyon ng MMDA traffic sector galing sa isang party ang biktima at papauwi na sana ng mangyari ang aksidente.
Sumalpok ito sa kasalubong na Toyota Vios habang pakaliwa sa West Avenue.
Ayon naman sa driver ng kotse, dumiretso pa ang motorcycle rider kahit na naka-stop ang traffic light.
Hindi niya ito agad napansin at dire-diretso rin ang kanyang takbo kaya hindi na niya ito naiwasan.
Nagtamo ng galos sa magkabilang tuhod at pamamaga ng balikat ang motorcycle rider na si Juan Paolo Enriquez, 26 anyos na nakatira sa Don Primitivo Extension sa Barangay Holy Spirit, Quezon City.
Nilapatan ng paunang lunas ng UNTV News and Rescue Team ang mga sugat ng biktima at isinugod sa East Avenue Medical Center.
Samantala, tinulungan ng UNTV News and Rescue Team ang motorcycle rider na bumangga sa likuran ng truck sa Barangay Panampunan, Tarlac City, pasado alas-10 gabi ng Miyerkules.
Kinilala ang biktima na si Randy Niebres 35 taong gulang residente ng Barangay Sta. Cruz, Tarlac.
Nagtamo ng mga sugat si Niebres sa kaliwang kamay na binigyan ng pang unang lunas ng grupo at saka inihatid sa Ramos General Hospital. (REYNANTE PONTE / BRYAN LACANLALE / UNTV News)
The post Vehicular accident sa Quezon City, nirespondehan ng UNTV News and Rescue Team appeared first on UNTV News.