Ang pagbubukas ng ikalawang season ng UNTV Cup nitong Martes ng gabi sa SMART-ARANETA Coliseum. (RODEL LUMIARES / Photoville International)
MANILA, Philippines — Opisyal nang ipinakilala nitong Martes ang sampung koponan na kalahok sa ikalawang yugto ng UNTV Cup (Ang Bagong Game Ko) sa Smart Araneta Coliseum, Quezon City.
Kabilang sa mga magtatagisan sa hard court ang Team Armed Forces of the Philippines (AFP), Philippine National Police (PNP), Department of Justice (DOJ), Supreme Court (SC), Metropolitan Manila Development Authority (MMDA), Philhealth, House of Representatives, Senate, LGU’s at team Malacanang.
Ang PNP Responders kasama ang kanilang mascots na sina PO1 MAGALANG at PO1 MALINIS at representatives ng kanilang chosen beneficiary. Bawat isang team ay pumarada kasama ang kanikanilang mga napiling paglalaanan ng panalo. (HERMES SINGSON/ Photoville International)
Round robin eliminations ang sistema ng laro, subalit sa pagkakataong ito ay hahatiin ang sampung koponan sa dalawang grupo. Ibig sabihin, makakalaban ng bawat koponan ang lahat ng teams sa grupo na kanilang kinabibilangan, at kung sino ang Top 4 ay siyang makakasama sa playoffs sa semi final round.
Dumalo sa opening ceremony ang mga officials ng mga participating government agencies tulad ng Team Manager ng MMDA Black Wolves na si Chairman Francis Tolentino at iba pang MMDA officials na nasa courtside bilang pagsuporta sa kanilang players at sa UNTV Cup. (FREDERICK ALVIOR / Photoville International)
Ang Top 2 teams ang siyang maglalaban sa kampeonato ng UNTV Cup.
Bawat koponan ay may tigda-dalawang imports na mismong sila ang pumili.
Ang mga laro sa UNTV Cup Season 2 ay inaasahang mas magiging maganda sa pagkakaroon ng bawat team ng 2 imports o reinforcements mula sa labas ng kanilang ahensya. Karamihan ng mga nakuha ng mga team ay ang mga retiradong PBA players. Ang depending champion naman na team Judiciary ay pinanatili si celebrity player John Hall na nakatulong sa kanila nang malaki upang mag-champion noong unang season. (ROVIC BALUNSAY / Photoville International)
Senate Defenders, tinalo ang House of Representatives sa score na 83-74
Samantala, sa pagbubukas ng palaro, pinalad na mapiling magharap sa unang pagkakataon ang Team Senate at Team House of Representatives para sa first official game ng torneo.
Kasama si UNTV Cup Commissioner Atoy Co, pinangunahan ni Mr. Public Service Kuya Daniel Razon ang ceremonial jumpball sa kaunaunahang laro ng season 2. (RODEL LUMIARES / Photoville International)
Unang pumukol ng score ang House of Representatives Solons sa pamamagitan ng three point shot ni Congressman Niel Tupas na agad ring tinapatan ng tres ni Senator Sonny Angara.
Tabla sa score na 20 ang first quarter.
Nagpakita ng triangle offense ang Senate Defenders na sinundan pa ng magagandang assist.
Ang mga empleyado ng Senado na todo-suporta sa Defenders. (ROVIC BALUNSAY / Photoville International)
Nagpatuloy sa outside shooting si Tupas upang iabante ng isang puntos ang first half, 42-41.
Sa 3rd quarter, umangat pa sa 4 points ang kalamangan ng Solons sa tulong ng guest player nito na si former PBA star Arnold Gamboa, ngunit hinabol ito ng Defenders sa pangunguna ng kanilang mga import na sina ex-PBA players Kenneth Duremdes at Zaldy Realubit.
Naging dikitan ang 1st half sa pangunguna ng Senate Defenders reinforcement na si former PBA star player Kenneth Duremdes at ni Iloilo Congressman Niel Tupas Jr. (PRINCE MARQUEZ / Photoville International)
Hindi naman natinag ang Solon captain ball na si Congresman Tupas upang bantayan at lusutan ang mga ex-PBA star ng Senado.
Gayunpaman, dahil sa ipinakitang epektibong steals at assist nina Senator Angara, umabante pa rin ang Defenders sa score na 55-62.
Pagpasok ng 4th quarter, tuluyan nang lumobo ang kalamangan ng Team Senate hanggang sa 18 points at nagsara sa score na 74-83. (DOMINADOR REYES / Photoville International)
Nagtala si Kenneth “Captain Marvel” Duremdes ng kabuoang 36 points, 8 assist, at 3 steal upang hiranging player of the game.
“Maganda sa team ko na kay Senator Sonny is he works hard during our practices. He wants to win, yun ang maganda sa attitude nya. Malaking factor din yung crowd, so much fun playing again of this huge crowd at yun ang namimiss ko during my playing years. Back to Big Dome,” masayang pahayag ni Duremdes.
“Palagay ko gaganda pa yung teamwork at hopefully mabigyan ng magagandang laro yun iba pang koponan. Nung una nangangapa pa kami pero andyan yung kakampi namin na magagaling so nag-gel kami bonding second to third quarter,” saad naman ni Sen. Sonny Angara, ang Captain Ball ng Team Senate.
Ang captain ball ng Senate Defenders na si Senator Sonny Angara. (REY VERCIDE / Photoville International)
Highest pointer naman ang perimeter shooter ng Iloilo na si Tupas na nagtala ng 22 points at 3 assist.
Shooting for 3: Iloilo 5th District Niel Tupas Jr. (CHARLIE MINION / Photoville International)
“Yun talaga ang laro natin as shooting guard. Alam mo naman ang UNTV Cup ay very prestigious cup at naghanda tayo, nag-ensayo tayo kaya laban tayo. We did our best pero siguro mas magaling lang ang senado ngayong gabi,” ani Tupas. (Mon Jocson / Pong Mercado / Ruth Navales, UNTV News)
(Left-Right) Nagsilbing court-side commentators sina sports analyst Sev Sarmenta, PBA Legends Coach Ronnie Magsanoc at Coach Gerry Codinera. (ROVIC BALUNSAY / Photoville International)