Ang 6 wheeled truck na bumangga sa likod ng isang 10 wheeled truck habang bumubuhos ang malakas na ulan sa northbound lane ng Katipunan Avenue, QC
(UNTV News)
QUEZON CITY, Philippines – Sugatan ang isang tsuper matapos bumangga ang minamaneho nitong truck sa isang 10 wheeled truck na may dalang mga bakal, alas-2:30 kaninang madaling araw, Martes, sa northbound lane ng Katipunan Avenue, Quezon City.
Kinilala ang biktima na si Jerry Dorado.
Ayon sa driver ng 10 wheeled truck na si Rodel Elcarte, papaliko ito sa isang construction site sa Katipunan Avenue nang biglang sumalpok sa likuran nito ang 6 wheeled truck na minamaneho ni Dorado.
“Dahan-dahan ako, naka-signal naman ako bigla na lang sumalpok sa puwitan ng truck,” pahayag ni Elcarte.
Madulas na kalsada ang sinasabing dahilan ng aksidente na dulot ng biglang buhos ng malakas na ulan kaninang madaling araw.
Sa tulong ng MMDA Rescue Unit ay nailabas sa loob ng sasakyan si Dorado at mabilis na isinugod sa East Avenue Medical Center. (Jerico Albano / Ruth Navales, UNTV News)