Naghihigpit na ang Bureau of Plant Industry sa mga prutas na binibyahe na apektado na rin ng cocolisap tulad ng lansones at mangosteen (UNTV News)
MANILA, Philippines — Hinigpitan ng Bureau of Plant Industry o BPI ang pagbibiyahe sa mga prutas na infested narin ng coconut scale insect o Cocolisap.
Bukod sa niyog ay napepeste narin ngayon ng Cocolisap ang lansones at mangosteen na tinatayang mahigit sa 500 libong puno na ang napipinsala.
Ayon kay Dr. Clarito Baron ng Department of Agriculture (DA), bahagi ng special quarantine order na inilabas ng BPI ay ang paglalagay ng 14 na checkpoint na nakakalat sa mga probinsya ng Cavite, Laguna, Batangas at Quezon.
Susuriin sa checkpoint ang mga pumapasok at lumalabas na mga prutas at plant materials.
Kapag infested ang ibinibyahe ay susubukan itong idaan sa treatment procedure o kaya’y kukumpiskahin at susunugin.
“Kapag may nakitang peste, ipababalik yan dun sa pinagmulan o di kaya, ito ay iti-treat i-spreyan ito ng cochin spraying material o kaya ito ay idedestroy.”
Payo ng BPI sa mga magbibyahe ng prutas, kumuha muna ng permiso sa Municipal Agriculture Office upang matiyak na walang Cocolisap ang ibibiyaheng produkto.
Ayon sa DA, malaki ang potensyal sa pandaigdigang merkado ng mangosteen.
“Ang mangosteen ngayon ay hindi lamang kinakain bilang isang prutas kundi ito’y isa ring medicinal plant”, ani Baron.
Sa balintawak market ay nagtaas na rin ang presyo nito.
“Mura lang yan dati. Bentahan namin dito 80 lang isang kilo niyan, minsan 70. Ngayon 120”, pahayag ni Criseldo Vargas na isang tindeo ng mangosteen.
Bukod sa mangosteen at lansones, may mga ulat narin na pati mangga, saging, at abokado ay mayroon na rin cocolisap.
Kamakailan lang ay nagpalabas ng protocol ang Department Of Science And Technology (DOST) at ang Philippine Coconut Authority kung paano mapupuksa ang pesteng nakaapekto na sa libo-libong puno ng niyog. Sa pagkakataong ito ay pag-aaralan naman nila ang para sa iba pang prutas na infested narin ng Cocolisap.
“For other trees, pag-aaralan naman the concentration and the amount that is to be injected and pag-aaralan din yung residual when is it safe na”, saad ni DOST Sec. Mario Montejo. (Rey Pelayo, UNTV News)