Yupi ang harapang bahagi ng isang SUV na siyang bumangga sa isa pang SUV at isang van sa Quezon Avenue noong Linggo, Hulyo 13, 2014 (UNTV News)
QUEZON CITY, PhiIippines — Isinugod sa magkahiwalay na ospital ang anim na sugatan sa banggaan ng tatlong sasakyan sa Quezon Avenue kagabi, Linggo.
Sangkot sa banggaan ang dalawang SUV at isang van.
Ayon sa imbestigasyon, binangga muna ng isang SUV na minamaneho ni Ruby Francisco ang isa pang SUV saka naman nadamay ang isang van sa kabilang lane ng Quezon Avenue.
Sugatan ang tatlong sakay ng van, gayundin ang tatlong sakay ng SUV na binangga ni Francisco.
“Tatlong sasakyan na nabangga po lasing po siya, positive sa alak,” pahayag ni MMDA Traffic Auxilliary John Nicholas.
Tinangka pa umanong tumakas ni Francisco subalit naharang ng taong bayan. Wala namang napaulat na lubhang nasugatan.
Posibleng maharap sa kasong driving under the influence of liquor si Francisco bukod pa sa ibang kaso dahil sa nangyaring aksidente. (Jerico Albano / Ruth Navales, UNTV News)