Nakahandusay sa kalsada ang bangkay ng isa sa mga holdaper matapos nitong holdapin ang isang pampasaherong jeep at magtangkang tumakas mula sa pulis kagabi, Hulyo 15, 2014 sa Novaliches, Quezon City (UNTV News)
QUEZON CITY, Philippines — Dalawang holdaper ang nasawi matapos na maka-engkuwentro ng mga pulis sa may RP Quirino Avenue sa Novaliches, Quezon city kagabi.
Dead on arrival sa Novaliches hospital ang isa sa mga suspect samantalang ang pangalawa ay nasawi sa may Rainbow One, Barangay San Bartolome matapos na magtanggkang tumakas.
Ang mga pulis ng Police Station 4 sa Novaliches ang rumesponde sa holdapan.
Ayon sa driver, sumakay ang dalawang suspek sa RP Quirino Ave., Novaliches subalit ilang sandali lamang ay nagdeklara ito ng holdap sa 4 na sakay ng jeep.
“Hinoldap nga po mga pasahero ko. Nakita ko din ung baril. Siyempre dumistansya na kami nung bumaba kasi baka barilin din kami”, pahayag ni Felipe Martin na siyang driver ng jeep.
“Konting ano lang nag-declare na agad ng holdap. Sabi niya ‘holdap”, saad naman ni Olivia na isa sa mga pasahero ng jeep.
Agad tumalon ng jeep ang isang biktima na naging dahilan upang matawag ang pansin ng mga pulis na nagpapatrolya ng mga sandaling iyon.
“Yung isang pasahero tumalon, so naalarma ung mga kapulisan natin na nagkataon namang nagpapatrolya”, wika ni QC Police Station 4 Commander P/C Supt. Norberto Cabagay.
“Tapos nung wala ng bahay po, nagdeclare po sila ng holdap kaya tumalon po ako kasi malapit lang ako sa pinto”, paliwanag ni Jetro na siyang tumalong biktima mula sa jeep. “Hinabol pa nga nila ako eh. Pinagbabaril pa nga nila ako eh.”
Nagtamo ito ng gasgas sa tuhod ang tumalong pasahero.
Narekober sa mga suspek ang isang 45 at 38 na kalibre ng mga baril.
Walang makitang ibang pagkakakilanlan sa mga biktima maliban sa mga tattoo sa katawan na Sputnik Gang. (Jerico Albano, UNTV News)