(Left-Right) Ang composer at interpreter ng awiting papuri ng “Ikaw Ang Musika” na sina Joshua Carias at Paula Bianca. (FRED ALVIOR / Photoville International)
MANILA, Philippines – Sa ikalawang linggo ng eliminasyon sa buwan ng Marso sa A Song of Praise (ASOP) Music Festival, tinanghal na “song of the week” ang awiting “Ikaw ang Musika” na likha ng baguhang kompositor na si Joshua Carias.
Tumugma ng lubos ang female rock ballad voice ng Viva artist na si Paula Bianca sa awitin.
Ayon kay Joshua, “Nabigyan niya ng justice eh. Natuwa ako sa ginawa niya kaya nga nung isang pasada ng rehearsal niya, okey na eh. Sabi ko, bitiwan mo lang ng emosyon, kargahan mo ng emosyon, pasok ‘yan.”
“Yung sa song na ‘to parang hinukay ko talaga lahat ng emosyon na naramdaman ko all through my life. So this is, this is a very challenging song despite na hindi siya ‘yung super birit pero eto talaga ano, ang labanan dito eh emosyon so talagang marami akong binaong emosyon,” pahayag naman ni Paula Bianca.
Dalawang ballad entries ang nakalaban ng komposisyon ni Joshua, ang “Lahat Man ay Mawala” ni Jetroeuel Quimoy na inawit ng singing champion na si RJ Buena at “Sa Iyo Ama” ni Niño Mas at Carlos Lacson na inawit naman ng isa sa MICA sisters na si Celina Cercado.
Muli namang nakasama ni “Doktor Musiko” Mon Del Rosario bilang hurado ang dalawa sa miyembro ng Music ang Magic na sina Jet Montelibano at Fe Delos Reyes. (Adjes Carreon / UNTV News)