Pagtulong ng UNTV News and Rescue Team Batangas sa biktima ng banggaan ng jeep at adventure nitong madaling araw ng Biyernes (UNTV News)
BATANGAS, Philippines — Nilapatan ng paunang lunas ng UNTV News and Rescue Team ang mga biktima sa banggaan ng jeep at adventure sa P. Torres street corner Emayo street sa Lipa City, Batangas pasado alas dos nitong Biyernes ng madaling araw.
Si Marissa Lou Abante ay nakaramdam ng pagkahilo dahil sa tinamong bukol sa kanang bahagi ng ulo.
Kasama si Marilou ng asawa nyang si Nestor Abante, driver ng jeep.
Ayon kay Nestor, binagbagtas nila ang kahabaan ng P. Torres street ng banggain ng adventure sa kanto ng E. Mayo Street.
Sa inisyal na imbestigasyon ng mga awtoridad, nakainom umano ang driver ng adventure na kinilalang si Julius Chavez.
Nangako naman si Chavez na sasagutin ang gagastusin sa nangyaring aksidente.
Samantala, sugatan ang motorcycle rider na si Donald Baynosa matapos banggain ng taxi sa Imelda Avenue alas dos kawarenta’y otso ng madaling araw.
Nagtamo ng gasgas sa kamay at braso si Baynosa na agad namang nilapatan ng pang-unang lunas ng UNTV News and Rescue team at saka inihatid sa Mission Hospital sa Taytay, Rizal.
Ayon sa nakasaksi sa pangyayari, tinangka pa umanong takasan ng taxi driver ang nabangga niyang motorcycle rider, kaya hinabol ito ng mga opisyal ng barangay.
Pahayag ng barangay tanod na si Antonio Ordopes, “Yung motor, di naman matulin ang takbo noon. Kundi itong taxi na ito, nagpumilit na… alam na nya na parating itong motor… nabangga niya. Ngayon di niya inaamin na siya ang nakabangga. Ang gusto niyang mangyari yung motor ang nakabangga sa kanya. Tumakas po ito. Sinigawan na naming (ngunit) hindi huminto.”
Sa huli nagkasundo ang magkabilang panig na sasagutin ng taxi driver ang damage sa motorsiklo. (UNTV News)
The post Banggaan ng jeep at adventure sa Lipa City, Batangas, nirespondehan ng UNTV News and Rescue appeared first on UNTV News.