Google Maps: Zamboanga City

ZAMBOANGA, Philippines — Patuloy na nagaganap ang sagupaan ng  militar at bandidong grupo ng Moro National Liberation Front o MNLF sa Barangay Sta. Barbara dito sa Zamboanga  City.

Habang sinusulat ang balitang ito ay nasa 3 na ang kumpirmadong patay at 5 naman ang sugatan.

Nagsimula ang sagupaan ng militar at mga rebelde kaninang alas singko ng umaga. Sa ulat ng isang local tv station sa Zamboanga City, bandang ala-una ng madaling araw na dumating ang 200 bandido sakay ng mga sasakyang pandagat sa Barangay Marique at Rio Hondo.

Galing ang mga rebeldeng MNLF sa basilan. Tinangka ng mga ito na pasukin ang city hall ng Zamboanga.

Samantala, tinatayang nasa 30 hostages ang hawak sa kasalukuyan ng mga bandido sa Barangay Talon-Talon at sa Sta. Catalina.

Ayon sa ulat, walong barangay na ang apektado ng nagaganap na engkuwento at ang mga ito ay ang Sta. Barbara, Sta. Catalina, Talon-Talon, Mapang, Rio Hondo, Lustre, Marique at Sinunoc.

Sinsabing ang Barangay Sta. Catalina ang sentro ng sagupaan.

Sa kasalukuyan, may blocking force na ang militar sa naka-deploy sa iba’t-ibang lugar upang hindi makapasok ang mga rebelde sa city proper.

Mahigpit na ring binabantayan ng militar ang mga paliparan at istasyon ng bus at suspendido na rin ang klase at pasok sa opisina sa buong Zamboanga City. (DENRY LOPEZ, UNTV News)

Ang ilan sa m ga kabilang sa grupong AKKSYON o Artista Kontra-Korapsyon sa panawagan ng pagiging solido kotra pork barrel scam (UNTV News)

MANILA, Philippines — Nanawagan ang ilang kilalang Filipino artist na magkaisa ang artist community sa bansa para sa pag-aalis ng pork barrel ng mga mababatas.

Inilunsad ng iba’t-ibang grupo ng mga artista sa bansa ang isang alyansa na AKKSYON o Artista Kontra-Korapsyon.

“This has gone on long enough. We call on fellow concerned artist and cultural workers to unite to stand for the abolition of the pork barrel system. This abuse will not stop unless we, along with the filipino people, face it with our collective strength,” ani Direk Joel Lamangan.

Ayon sa national artist na si Bienvenido Lumbera, bukod sa pagiging tax payer ng lahat, ramdam ng mga nasa larangan ng pag-arte ang mga katiwalian sa paggamit ng pondo ng gobyerno.

Sinabi naman ng beteranong teather artist na si Nanding Josef, sa kanyang halos apat-na-pung taon sa industriya, tila hindi pa rin umunlad ang larangan ng pagtatanghal sa bansa.

Kwento nito, dalawang produksyon ang kanilang binuo para sa kamalayan ng ating lipunan subalit hindi naging prayoridad na mabigyan ng pondo.

Masakit para sa kanila na mabalitaan ang di umano’y paglustay sa kaban ng bansa.

Ani Direk Josef, “Kasi ilang taon na rin kaming humihiling ng pera sa mga sendor at kongresista para magamit for arts education. Meron kaming play sa Tanghalang Filipino entitled ‘Anatomy of Corruption’ at ‘Walang Kocorrupt’, pareho yun tungkol sa korapsyon. Masakit sa amin dahil yung sinsabing priority project nila eh kay Napoles pala napupunta.”

Kasama rin sa pagbuo ng AKKSYON ang iba’t-ibang organisasyon sa sining at maging ang grupong Mga Kabataang Artista para sa Tunay na Kalayaan o KARATULA. (PONG MERCADO, UNTV News)

Artist impression: Zero Remittance Day on September 19, 2013 (Credits: Google and Google Maps)

MANILA, Philippines – Makikiisa ang mga Filipino worker sa Hong Kong sa “Zero Remittance Day” ng mga OFW sa Setyembre 19.

Layunin ng zero remittance day na ipakita ng mga Pilipinong nagtatrabaho sa ibayong dagat  ang kanilang pagkadismaya sa maling paggamit ng pera ng bayan.

Nais din nilang i-protesta ang mga nagaganap na katiwalian sa gobyerno, mabagal na paglilitis sa mga tiwaling opisyal at ang special treatment ng pamahalaan kay Janet Lim Napoles na umano’y utak ng pork barrel scam.

Sinabi naman ng Malacañang na dapat ding isaalang-alang ng mga OFW ang kanilang pamilyang maaapektuhan ng naturang pagkilos. (UNTV News)

FILE PHOTO: MNLF Legal Counsel and Spokesperson Emmanuel Fontanilla. (PHOTOVILLE International / Ritchie Tongo)

ZAMBOANGA CITY, Philippines — Walang plano ang Moro National Liberation Front (MNLF) na lusubin at kubkubin ang Zamboanga City Hall.

Paliwanag ni Atty. Emmanuel Fontanilla, ang legal counsel ng MNLF, nais lamang sana ng kanilang mga miyembro at taga-suporta na magsagawa ng mapayapang rally kaninang madaling araw ngunit nauwi ito sa bakbakan.

“We have done that in Davao we creed out flags in Davao near the city halls we have also conducted holding of flags in General Santos City near the city hall at the back of the city hall and there was nothing that happened, ito lang si Mayor Climaco ang hindi namin maintindihan kung ano ang nasa isip niya noon,” ani Fontanilla.

Sa ngayon ay nananawagan ang pamunuan ng MNLF ng third party intervention upang makipag negosasyon at mapahupa ang tensiyon.

Ayon kay Fontanilla, mayroon na silang nilagdaang peace agreement at ng pamahalaan kasama ang Organization of the Islamic Conference kaya umaasa silang matutulungan sila ng United Nations at ang bansang Indonesia sa problema ngayon sa Zamboanga.

Dagdag pa ng abogado, nais din nilang pangunahan ng isang independent party ang imbestigasyon upang lumabas ang katotohanan kung sino ang nagsimula ng kaguluhan.

“There are counter allegations and allegations it would be prudent for every parties to seek for third party intervention on this matter to seek the truth.”

Sinabi pa ni Fontanilla na ikinalungkot ni MNLF founding chairman Nur Misuari ang pangyayari lalo na ang pagkamatay ng anim na tao.

“We are saddened and we would like to make it very clear to everybody listening that we detest we do not like war,” saad pa nito.

Samantala mariin namang kinundena ng regional government ng Autonomous Region in Muslim Mindanao (ARMM) ang pangyayari.

Agad na ring inalerto ni ARMM Governor Mujiv Hataman ang mga awtoridad sa kalapit na mga lugar ng Zamboanga gaya ng Basilan, Sulu at Tawi Tawi sa posibleng spill over ng pangyayari. (Louell Requilman / Ruth Navales, UNTV News)

FILE PHOTO: Rice (PHOTOVILLE International)

MANILA, Philippines – Iniimbestigahan na ng Department of Agriculture (DA) ang nasa likod ng text blast ukol sa rice crisis.

Ayon kay DA Secretary Proceso Alcala, target nilang matapos ang imbestigasyon sa susunod na linggo.

Aniya, makakaasa ang taumbayan na sapat ang suplay ng bigas sa dalawamput walong warehouse ng National Food Authority (NFA) sa Metro Manila.

“Wala pong crisis sa ating bigas,” anang kalihim.

Samantala, aminado si Alcala na may pagtaas sa presyo ng commercial rice ngunit inaasahang babalik ito sa normal na presyo kapag nagsimula na ang panahon ng anihan.

“Nagha-harvest na po, within this week pupunta ako sa mga lalawigan na at iche-check ko mga harvest area, dapat bumaba dahil nandyan na suplay.”

Sinabi pa ni Alcala na posibleng mga rice smuggler ang nasa likod ng pagpapakalat ng text message na may krisis sa bigas base sa impormasyong nakarating sa kanyang tanggapan.

Mayroon din aniyang nagpapakalat ng text message na may ipinamamahaging libreng bigas sa ilang pamilihan gaya sa Pritil at Commonwealth Market.

Nagtataka rin ang kalihim kung bakit sa halip na pila ng bigas ay pera umano ang ipinamimigay.

“(Rise smugglers ba yan?) Maari po sapagkat sila po yung baukulan nito sapagkat nang higpitan ng NFA  yung pagpasok ng bigas at di tayo pumayag na dodoblehin eh marami pong nagagalit, mahirap gumawa ng matuwid at tama.”

Tiniyak naman ng kalihim na pananagutin nila ang nasa likod text blast.

“Ito po’y hindi biro-birong gawain. Hindi ito pwede basta palampasin, ibig sabihin na may hindi maayos na kaluluwa sa ating bansa na ang iniisip na pansarili lamang,” saad pa ni Alcala. (Bryan De Paz / Ruth Navales, UNTV News)

Ang mga lokal na residente sa Zamboanga City na nakikiusyoso sa mga pangyayari sa pagitan ng MNLF o Moro National  Liberation Front at pwersa ng pamahalaan nitong Lunes, September 09, 2013. (CREDITS: Philippine Information Agency)

MANILA, Philippines — Hindi dapat ikabahala ng publiko ang nangyayari ngayong kaguluhan sa Zamboanga City.

Ayon kay PNP Spokesperson Sr. Supt. Wilben Mayor, mariing ipinag-utos ni PNP Chief Dir. Gen. Alan Purisima sa kanyang mga tauhan sa Zamboanga na maging alerto at siguruhin ang kaligtasan ng mga sibilyan.

“We ate closely coordinate with the LGU , crisis management committee, PNP regional offices to Mindanao and PNP special unit are directed to maintain highest alert and vigilance to ensure safety to the public,” ani Mayor.

Ayon pa sa opisyal, kasama ang Philippine National Police sa mga gumagawa ng paraan upang matigil na ang kaguluhan.

“Rest assured that the PNP is doing its best.”

Iginiit din nito na hindi dapat mag-alala ang publiko dahil patuloy ang pagkilos ng PNP at AFP upang protektahan ang mga sibilyan sa lugar.

“Your PNP is in top of the situation to ensure public safety and to resolve the conflict in Zamboanga City,” pahayag pa ni Mayor.

Kaugnay nito’y, nanawagan din ang pulisya sa publiko na makipagtulungan upang mabilis na mahuli ang mga miyembro ng MNLF breakaway group na nanggugulo sa lugar. (Lea Ylagan / Ruth Navales, UNTV News)

Kabilang ang sundalong ito sa mga nasugatan sa nagaganap ng sagupaan sa pagitan ng pwersa ng militar at ng Moro National Liberation Front sa Zamboanga City nitong Lunes, September 09, 2013. (Philippine Information Agency)

ZAMBOANGA CITY, Philippines — (Update) Umakyat na sa 6 ang bilang ng mga nasawi habang 24 ang sugatan sa nangyayaring kaguluhan sa pagitan ng militar at Moro National Liberation Front (MNLF) sa siyudad ng Zamboanga.

Kabilang sa mga nasawi ang isang pulis, isang Navy personnel at 4 na sibilyan.

Umabot na rin sa 220 ang hostages.

Ilan sa mga hiningi ng MNLF bago mag-alas-6 nitong gabi ang mga sumusunod:

1. Lugar na mapagpapahingan kasama ang mga hostages.

2. Bigyan sila ng daan upang makapagmartsa papunta sa city proper upang makapagtayo ng kanilang bandera.

3. 1 on 1 meeting kay Mayor Beng Climaco.

Samantala, patuloy pa rin ang rescue operations ng mga awtoridad sa mga sibilyan sa mga kalapit na barangay na apektado ng kaguluhan.

Pinapayuhan ng mga awtoridad ang publiko na maging maingat at maghanda ng tubig, flashlight, kandila, mga pagkain at iba pang kakailanganin pagsapit ng gabi.

Sa kasalukuyan ay mahigit isanlibo na ang mga evacuee na nasa grandstand.

Nanawagan naman ang lokal na pamahalaan ng Zamboanga sa mga nais magdonate ng relief goods upang matugunan ang pangangailangan ng ating mga kababayan. (Denry Lopez / Ruth Navales, UNTV News)

FILE PHOTO: DILG Sec. Mar Roxas (Google Maps / UNTV News)

MANILA, Philippines – Pangunahing misyon ng pamahalaan ngayon ay ang gawin ang lahat ng paraan upang hikayatin ang armadong grupo ng MNLF na palayain ang lahat ng mga residenteng bihag at ginagawang ‘human shield’ laban sa operasyon ng militar at pulis.

Ito ang ipinahayag ni Interior and Local Government Secretary Mar Roxas na ngayon ay nasa Zamboanga City upang personal na imonitor ang ginagawang aksyon ng lokal na pamahalaan ng Zamboanga sa kasalukuyang krisis.

Ayon kay Roxas, hindi titigil ang operasyon ng pamahalaan hangga’t may natitirang residente na hawak ng armadong grupo.

Tiniyak rin ng kalihim na pananagutin ng pamahalaan ang lahat ng may kaugnayan sa kaguluhan sa Zamboanga. (UNTV News)

Kinaumagahan ng pakikipagbaka ng pwersa ng militar sa pwersa ng MNLF ay pinakawalan ang 5 bihag nitong umaga ng Martes. (PHILIPPINE INFORMATION AGENCY)

ZAMBOANGA CITY, Philippines — Pinalaya na ng Moro National Liberation Front (MNLF) ang lima sa 168 nitong bihag sa Zamboanga City kaninang umaga, Martes.

Sa ngayon ay naka-stand down ang pwersa ng militar upang bigyang daan ang pagkikipag-usap ng crisis management committee upang mapalaya  ang iba pang bihag.

Sinabi ni AFP PAO Chief Lt. Col. Ramon Zagala na bagama’t may naririnig pa rin na paminsan-minsang putok ng baril, ito ay upang huwag makatakas o makaabante ang mga rebelde.

Ayon pa sa opisyal, nanatili pa rin sa barangay Sta. Catalina, Sta. Barbara, Talon Talon at Kasangyaan sa Zamboanga City ang may 180 miyembro ng rogue Misuari group ng MNLF.

Samantala, pinabulaanan naman ng AFP na ito ang unang nagpaputok sa nangyaring bakbakan.

Para sa sandatahang lakas, ang grupo ng MNLF na lumusob sa Zamboanga ang dapat magpaliwanag sa kanilang ginawa.

“If peaceful protest why bring hundred of armed men in the city. Why 1am in the morning why enter in the cover of darkness. These are the questions that they have to answer,” ani Zagala.

Sa ngayon ay naka-red alert pa rin ang buong pwersa ng Western Mindanao Command (WESTMINCOM) upang maiwasan ang pagkalat ng gulo sa iba pang lugar.

Tiniyak rin ng AFP na sapat ang pwersa ng Task Force Zamboanga at WESTMINCOM upang kontrolin ang sitwasyon sa lungsod. (Victor Cosare / Ruth Navales, UNTV News)

(L-R) Janet Lim Napoles and President Benigno Aquino III (UNTV News / PNP)

MANILA, Philippines — Sisimulan na ng pamahalaan ang pagsasampa ng kaso laban sa mga indibidwal na umano’y sangkot sa P10 billion pork barrel scam.

Sinabi ni Pangulong Benigno Aquino III na posibleng sa Lunes o sa Biyernes nila isapormal ang paghahain ng kaso.

Ayaw naman magbigay ng timeline ng pangulo sa magiging takbo ng kaso dahil ang nais niya ay matiyak na may mananagot at maparurusan.(UNTV News)

Kaugnay ng isasagawang Barangay at SK Elections ngayong Oktubre ay magpapatupad ng gun ban ang pamahalaan na magsisimula sa Septyembre 28 hanggang Nobyembre 12. (UNTV News)

MANILA, Philippines — Muling isasailalim ng Commission on Elections (COMELEC) ang buong bansa sa gun ban sa darating na October 28 para sa halalang pam-barangay at Sangguniang Kabataan (SK).

Ipatutupad ito kasabay ng pagpasok ng election period na magsisimula sa September 28 hanggang November 12, 2013.

Noong isang linggo, sinimulan na ng COMELEC ang pagtanggap ng aplikasyon para sa gun ban exemption.

Sinabi ni Commissioner Elias Yusoph na renewal application na lamang ang gagawin ng mga naaaprubahan na noong May-2013 midterm Elections.

“For those who will be renewed, you will only submit the requirements of request for renewal and present their receipts during the May 2013 Elections and the Certificate of Authority, for renewal.”

Noong nakaraang halalan, umabot sa mahigit limang libong aplikasyon ang natanggap ng COMELEC, habang mahigit apat na libo lamang ang naaprubahan.

Kabilang sa mga exempted sa gun ban ang mga militar, pulis, mga government law enforcement agency at miyembro ng diplomatic corps.

Maaari namang i-retain ang mga police close-in-security ng mga senador, kongresista, gobernador at mga mayor na may isang taon nang naninilbihan sa kanila.

Subalit ang lahat ng mga ito ay kinakailangan ihain ng pormal sa COMELEC.

Paalaala ng komisyon, istriktong ipatutupad ang gun ban upang maiwasan ang karahasan sa halalan.

Ayon kay Yusoph, karanasan na ng COMELEC na mas mainit ang pagdaraos ng barangay elections kumpara sa national polls.

“Mas tensyunado ito dahil magkakapatid, magkakaibigan, magpipinsan at magkakamag-anak ang magkakalaban. We would like to appeal that those who are not authorized to carry firearms should not carry firearms.” (Pong Mercado / Ruth Navales, UNTV News)

FILE PHOTO: Moro National Liberation Front Founding Chairman Nur Misuari (UNTV News / Google Maps)

MANILA, Philippines — Kinondena ng Metro Manila Muslim Community for Justice and Peace ang ginagawang pang-gugulo ng Moro National Liberation Front (MNLF) sa Zamboanga City.

Ayon kay Datu Basher Alonto, chairman ng grupo, nakalulungkot na marami ang nadadamay na sibilyan sa pangyayari.

“Yun ang nakakalungkot na nagkakaroon ng patayan, may mga taong nagkakaroon ng damages at naghihirap lalo na yung mga walang kamuwang-muwang ay nabibiktima ng nangyayari sa Zamboanga City.”

Sinabi pa nito na makikipag-usap siya sa grupo ni Misuari kasama ang 10 pang Muslim leader upang matigil na ang kaguluhan sa siyudad.

“Ang plano namin bukas ay pumunta sa Zamboanga dahil ang gusto namin ay kausapin siya at isa isa namin masabi baka sakali makita namin si Chairman at pakinggan kami,” pahayag pa ni Alonto.

Dagdag pa nito, mahigpit nilang binabantayan ang muslim community sa kanyang nasasakupan upang maiwasan na magkaroon ng symphatizer ang grupo ni Misuari.

“Sa lahat ng Muslim community dito sa Metro Manila ay nakamonitor kami kagabi nga ay nagmeeting kami at inaassume namin na ung mga kapatid dito sa Luzon ay hindi magkaka problema dito,” panawagan ni Alonto. (Lea Ylagan / Ruth Navales, UNTV News)

FILE PHOTO: President Benigno Aquino III (CREDITS: Malacanang Photo Bureau / Google Maps)

MANILA, Philippines — Inatasan na ni Pangulong Benigno Aquino III ang Department of Justice (DOJ) na pag-aralan ang pagsasampa ng kasong rebelyon laban kay Moro National Liberation Front (MNLF) Chairman Nur Misuari.

Kaugnay ito ng ginawang paglusob ng MNLF soldiers at pag-ukupa sa ilang barangay sa Zamboanga City.

Ayon sa Pangulo, “Yung susuriin ng sinomang abogado yung elements in inciting to sedition or rebellion kulang, dito sa nangyayari sa Zamboanga City allegedly nandun siya pero I have to stressed allegedly dahil walang nakikipagusap sa kanya di siya lumalabas at nagdedeklara ng whatever.”

Sinabi pa ni Pangulong Aquino na wala pang plano ang gobyerno ng magdeklara ng state of emergency sa siyudad.

Wala ring itinakdang deadline ang pangulo kaugnay sa pagresolba sa krisis sa Zamboanga upang matiyak ang seguridad ng mga sibilyan sa lugar.

Ipinahayag naman ng Pangulo ang nakikita nyang dahilan ni Misuari sa paglusob sa Zamboanga City.

“Chairman Misuari seems unsatisfied parang honestly personally parang dating sa akin kapag hindi siya ang magiging pinuno kung anuman ang mangyayari sa ARMM eh hindi siya sang-ayon,” anang pangulo. (Nel Maribojoc / Ruth Navales, UNTV News)

FILE PHOTOS: (L-R) Janet Lim Napoles and President Benigno Aquino III (MALACANANG PHOTO BUREAU)

MANILA, Philippines — Inaasahang sa loob ng linggong ito ay maihahain na ng Department of Justice (DOJ) ang kauna-unahang kaso laban kay Janet Lim Napoles na umano’y utak sa 10-billion peso pork barrel scam.

Sinabi ni Pangulong Benigno Aquino III na posibleng sa Biyernes o Lunes ay maihain na ang kaso.

“The first charges with regards to this issue I understand will be filed not later than Monday there’s a possibility it will filed on Friday.”

Ayon sa Pangulo, ibabase sa ebidensya at teorya ang kauna-unahang kasong isasampa kay Napoles.

Hindi naman masabi ng Pangulo kung may mga mambabatas na sasampahan din ng kaso.

Samantala, muling binigyang diin ng Pangulo na hindi pa niya nakikilala si Napoles kahit noong senador pa siya kaya malabong magkaroon siya ng kaugnayan dito.

“When I saw her when came to the palace I strive to look at her and I don’t remember, normally, I’m very good with faces baka sometime I’m poor with names she’s not look familiar.” (Nel Maribojoc / Ruth Navales, UNTV News)

A handout photo dated and released by Philippine Information Agency-Western Mindanao on 10 September 2013 shows a fire at Sta.
Barbara township, Zamboanga City.

ZAMBOANGA CITY, Philippines — (Update) Muling tumaas ang tensyon sa Zamboanga dahil sa sunog na naganap sa limang bahay sa Brgy. Sta. Barbara, Martes.

Ayon sa lokal na pamahalaan ng Zamboanga City, ang mga mortars na pinaputok ng Moro National Liberation Front (MNLF) ang sanhi ng sunog.

Hindi naman makapasok ang mga fire truck upang apulahin ang sunog dahil walang order ang Philippine Army kung maari nang pumasok sa lugar ng sunog.

Samantala, dumating na kaninang umaga sa Edwin Andrews Airbase ang karagdagang pwersa mula sa hanay ng militar, pulis at navy.

Nanawagan naman ang Zamboanga PNP sa mga mamamayan na kaagad i-report sa mga numerong 117 / 166 / 0906-368-0749 sakaling may makitang miyembro ng MNLF sa kanilang lugar.

Pinapayuhan rin ang mga residente na manatili na lamang sa kanilang mga tahanan upang matiyak ang kanilang kaligtasan. (Denry Lopez / Ruth Navales, UNTV News)

FILE PHOTO: Ang pila sa immigration sa arrival area sa Ninoy Aquino International Airport para sa mga pasaherong may hawak na Philippine passport. (MARLON BRIOLA / Photoville International)

MANILA, Philippines — Nasa bansa na ang 41 OFW na inilikas ng pamahalaang Pilipinas mula sa bansang Syria dahil sa nagpapatuloy na kaguluhan doon.

Alas-3:20 ng hapon nitong Martes nang lumapag sa NAIA Terminal 1 ang Eithad Airways Flight EY424 lulan ang mga Pinoy worker.

Agad na hinarap ng mga tauhan ng Overseas Workers Welfare Administration (OWWA) ang mga OFW upang makuha ang mga impormasyon at matulungan sa kanilang mga pangangailangan.

Ayon sa Department of Foreign Affairs (DFA), ang mga ito ang pinakabagong nadagdag sa bilang na 4,741na napauwi na ng pamahalaan mula nang magsimula ang repatriation.

Napilitang umuwi ang mga Pinoy worker dahil sa banta ng Estados Unidos na air strike sa Syria dahil sa paggamit nito ng chemical weapons na pumatay ng libu-libong sibilyan.

Patuloy namang umaapela ang pamahalaan ng Pilipinas sa mga Pilipinong nasa Syria na tanggapin na ang iniaalok na government-supported repatriation.

Sa ngayon ay pansamantala munang manunuluyan sa transient house ng OWWA ang 41 OFW habang naghahanda pauwi sa kani-kanilang probinsya. (Mon Jocson / Ruth Navales, UNTV News)

Sa isang noise barrage ng KMU nitong Martes, September 10 sa harap ng tanggapan ng DOLE ay hiniling ang pagbibitiw ng Kalihim na Rosalinda Baldoz. (UNTV News)

MANILA, Philippines — Isang noise barrage ang isinagawa nitong Martes, September 10 ng Kilusang Mayo Uno (KMU) sa harapan ng opisina ng Department of Labor and Employment (DOLE) sa Intramuros, Maynila  upang hilingin ang pagbibitiw sa pwesto ni Secretary Rosalinda Baldoz.

Ito ay dahil sa anila’y kakarampot na umento sa sahod ng mga obrero.

Ayon sa grupo, isang insulto para sa mga obrero ang 10-peso wage increase na inaprubahan ng kagawaran.

Sinabi ni Lito Ustares, ang Executive Vice President ng KMU, hindi ito sapat lalo pa’t patuloy sa pagtaas ang presyo ng mga bilihin tulad ng bigas, kuryente, tubig at petrolyo.

“Ito yung unang araw na pagdedeklara namin ng giyera dito sa departamentong ito, laban sa secretary of labor na ito. Hindi sila nakakaintindi ng wasto at tamang halaga, dahil itong sampung piso na ito ay halos hindi pa magkakasya sa pamasahe ng manggagawa.”

Gamit ang spray paint, sinulatan ng grupo ang pinto ng DOLE upang ipakita ang pagkondena nila sa regional wage board.

Binato rin ng sampung pisong barya ng isang galit na lider-manggagawa ang building ng DOLE.

Ayon kay Cesar Ilao ng Koalisyon ng Progresibong Manggagawa at Mamamayan, P125 across the board ang matagal ng wage increase na hinihiling ng mga mangagawa at hindi barya na wala ng mabibili.

“Upang ipakita sa DOLE na isang malaking insulto. Eh, yung P10 yan katumbas lang ng 10 candy. Eh hindi po makakabili kahit ¼ kilo ng bigas.”

Ang grupong ito ng mga manggagawa ay kalahok sa malawakang rally na tinawag na “EDSA Tayo”. (Pong Mercado / Ruth Navales, UNTV News)

Nitong Martes, sa boto ng 15 mahistrado ng Korte Suprema, sa pamamagitang ng isang TRO ipinatitigil ang pagre-release ng natitira pang pork barrel na nakapaloob sa 2013 national budget. (UNTV News)

MANILA, Philippines – Pinigil ng Korte Suprema ang pagpapalabas ng natitira pang Priority Development Assistance Fund (PDAF) ng mga mambabatas na nakapaloob sa 2013 national budget.

Isang temporary restraining order ang inisyu ng Supreme Court at pinagbabawalan ang Department of Budget and Management (DBM), National Treasurer at Executive Secretary na magpalabas pa ng pondo mula sa pork barrel ng mga senador at kongresista.

Sakop din ng TRO ang release ng Malampaya funds.

Ayon kay Supreme Court Spokesperson Atty. Theodore Te, papayagan lamang ang pagpapalabas ng pondo ng Malampaya kung gagamitin ito para sa energy resource development and exploitation programs at mga proyekto ng gobyerno.

Base sa datos ng DBM, P24.79 billion ang nakalaan sa PDAF ng mga mambabatas ngayong taon, P11.58 billion dito ang nai-release na, habang P13.21 billion pa ang natitira.

Bukod sa inilabas na TRO, inatasan din ng korte ang senado, kamara at opisina ng pangulo na sagutin ang inihaing mga petisyon sa loob ng sampung araw.

Nagtakda rin ang Supreme Court ng oral arguments sa October 8 upang talakayin ang kaso.

Tatlong magkakahiwalay na petisyon ang nakahain ngayon sa Korte Suprema na humihiling na ideklarang labag sa saligang-batas ang sistema ng pork barrel at tuluyan na itong i-abolish.

Kabilang sa mga petitioner ang natalong senatorial candidate na si Greco Belgica, Social Justice Society at si dating Boac, Marinduque Mayor Pedrito Nepomuceno.

Samantala, iginagalang naman ng Malakanyang at ng mga mambabatas ang inilabas na TRO ng Supreme Court.

Ayon kay Sen. Chiz Escudero, “May TRO man o wala, naka-hold na sa amin.”

“We will abide to the SC TRO,” pahayag naman ni Senate Pres. Franklin Drilon.

Ayon naman kay ABAKADA Party-list Rep. Jonathan Dela Cruz, “OK lang na i-TRP basta ma-address yung scholarships kasi magpa-finals na ngayon.”

Magugunitang una nang sinuspinde ng Palasyo ang pagpapalabas ng pork barrel ng mga mambabatas. (Roderic Mendoza / Ruth Navales, UNTV News)

Ang tinanghal na Song of the Year para sa A Song of Praise Music Festival Year 2, ang awiting nilikha Boy Christopher Jr. at binigyang buhay ni Jonalyn Viray, ang ‘Ikaw’. (MARLON BONAJOS / Photoville International)

MANILA, Philippines — Nakakuha ng 89.40% ang awiting “Ikaw” sa ginanap na grand finals night ng A Song of Praise (ASOP) Music Festival  2013 sa Smart Araneta, Lunes.

Humanga ang mga hurado sa komposisyon ni Boy Christopher Ramos Jr. na inawit ng Pinoy Pop Superstar Grand Champion na si Jonalyn Viray.

Tumayong hurado sina Joey De Leon, Kathleen Dy-Go,  Annabelle Regalado-Borja,  Audie Gemora, Dr. Raul Sunico Ph.D., Mon Del Rosario at Snaffu Rigor.

(Left-Right) Veteran actor & OPM artist Joey de Leon; Universal Records General Manager Kathleen Dy-Go; Composer/Singer/Actress Annabelle Borja; Theater actor / singer & composer Audie Gemora; OPM Hitmaker / Composer Mon Del Rosario; Cultural Center of the Philippines President, UST Dean & Professor in Music and Statistics at the Conservatory of Music / International pianist Dr. Raul Sunico, Ph.D.; Veteran OPM Artist & Composer Snaffu Rigor (PRINCE MARQUEZ / Photoville International)

Lubos ang kaligayahan ng kompositor na si Boy Christopher nang tanghaling song of the year ang kanyang likhang awit at maiuwi ang P500,000 grand price.

“Masayang masaya po, ito ay inihahandog ko higit sa lahat sa Dios, maraming maraming salamat sa ating Panginoon kasi talaga namang para sa Kanya yung ginawa ko.”

Pahayag naman ni Jonalyn, “sobrang nakakarelate kasi pag may pagkakataon na may problema tayo na down tayo maraming negative na bagay na dumarating satin Sya yung nagga-guide satin sa lahat ng negative, Siya yung positive.”

(Left to Right) Ang mga runners up sa ASOP Year 2. Sina composer RJ Jimenez at interpreter Miro Valera para sa ‘I Am Grateful’, 1st Runner Up; interpreter Gerald Santos at composer Christian Obar para sa ‘Lagi Kang Nariyan’, 2nd Runner Up; at para sa awiting ‘You’ll See Miracles’ ang interpreter na si Carl Trazo at composer Paul Hildawa, 3rd Runner Up. (REY VERCIDE / Photoville International)

Nakuha naman ng awiting “I Am Grateful” na komposisyon ni RJ Jimenez at inawit ni Miro Valera ang 1st runner up at ang P250,000 cash price.

Nagwagi naman ng P150,000 cash at tinanghal na 2nd runner up ang awiting “Lagi Kang Nariyan” na komposisyon ni Christian Obar at inawit naman ng Pinoy Pop Superstar Grand Champion noong 2006 na si Gerald Santos.

Nasungkit rin ng awiting “You’ll See Miracles” ang 3rd runner up na inawit ni Carl Trazo sa komposisyon ni Paul Hildawa kasama ang cash prize na P100,000.

Sa huli, tinanghal na best interpreter si Jonalyn Viray na nag-uwi ng P50,000.

A Song of Praise Music Festival 2013 Best Interpreter Jonalyn Viray. (ROVIC BALUNSAY / Photoville International)

Bago matapos ang gabi, muling pinabilib ng ASOP 2012 grand finalists ang mga manonood.

Ang ASOP ay pinasimulan ni Bro. Eli Soriano (Presiding Minister ng MCGI) at ni Mr. Public Service Kuya Daniel Razon upang mahikayat ang mga amateur at professional song writers na lumikha ng magagandang papuring awit sa Dios.

“Kung mayroong masaya ngayong gabi alam ko ang Dios masaya ngayon,” ani Bro. Eli.

Isang magandang balita naman ang inanunsyo ni Kuya Daniel dahil sa mga susunod na taon ay sisimulan na ang A Song of Praise Music Festival International.

“We will be coming up with the international nang ASOP Music Festival ang kailangan namin dito na mabuo na ang mechanics dahil ang mangyayari dito out of sa mga nag-compete dito sa ‘tin we will come up with the representative na syang magrerepresent ng Pilipinas na lalaban naman sa ibang countries na magpapasok ng kanilang mga entry, so there will be ASOP na gagawin natin sa abroad at iba’t ibang countries,” pahayag ni Mr. Public Service.

Ang 2013 ASOP songs ay maaaring i-download ng libre sa www.asoptv.com. (Grace Casin / Ruth Navales, UNTV News)

Si Bro. Eli Soriano (nasa LED wall) sa kanyang pagsasalaysay kung paano nagpasimula ang patimpalak na ito ng mga papuring awit para sa Dios, ang A Song of Praise Music Festival. (PRINCE MARQUEZ / Photoville International)

FILE PHOTO: Local tourists boarding a plane of Philippine Air Lines. (DOMINIC MEILY / Photoville International)

MANILA, Philippines — Hindi na hahanapan ng printed copy ng kanilang ticket ang mga pasahero sa mga airport sa kanilang paglabas o pagpasok sa bansa.

Ito ang ipinahayag  ng Department of Justice at Bureau of Immigration.

Inalis ng DOJ at BI ang requirement na magpakita ng printed copy ng ticket upang mas mapadali ang access sa mga serbisyo ng gobyerno.

Sa halip ay maaari na lamang gamitin at ipakita ang mga electronic tickets sa pamamagitan ng mobile devices gaya ng smart phone at tablet. (UNTV News)